في مكتبات بيع الكتب الضخمة في دبي غالبا بيكون فيه كافيه أنيق داخل المكتبة. الشيء الجميل اللي مكنتش أعرفه قبل كدا إن مسموحلك تاخد أي كتاب من المكتبة وتقعد تقرأ فيه زي ما انت عايز وأنت تتناول مشروبك.
المكتبة ضخمة جدا وفيها ما لذ وطاب من الكتب. وسألت موظف الكافيه هل فعلا مسموح أجيب أي كتاب وأقعد في الكافيه أقرأ فيه زي ما أنا عايز؟ وطلع الكلام مظبوط.
مش كدا وبس، إنت كمان لما تخلص قراءة بتسيب الكتاب على الترابيزة في الكافيه لأن المكتبة كبيرة جدا وممكن تكون نسيت إنت جايب الكتاب من أي مكان فمفيش داعي تتعب نفسك والموظفين هيرجعوه بنفسهم.
إيه الحلاوة دي أقسم بالله. الناس دول طيبين أوي يا خال
وبعد تناول المشروب ودفع ثمن المشروب، فكرت مرة ثانية، ولقيت ثمن المشروب أصلا يعادل كتاب متوسط السعر. مش كدا وبس، إنت أصلا لو الكتاب عجبك هتحتاج تشتريه عشان تكمل قراءة في البيت، ويبقى انت كدا اشتريت الكتاب + ثمن المشروب.
دا احنا اللي طيبين أوي يا خال :)
