رفقا بهؤلاء
* العامل الجديد في المطعم اللي قدملك الطعام أو الشراب بطريقة لم تعجبك
* عامل الدليفري الجديد اللي اتأخر بالطلب بتاعك عشان لسه مش عارف الطريق واتصل بيك أكثر من مرة عشان يعرف يوصلك
* سواق التاكسي الجديد اللي دخل في شارع غلط وتسبب في تأخيرك بعض الوقت لأنه لسه مش عارف الطرق
الناس دول يا جماعة وأي عامل بيبدأ شغله جديد بيكونوا ما صدقوا لقوا شغلانة يقدروا يعيشوا منها. الناس دول بيكونوا في أمس الحاجة لمساعدتنا وتشجيعنا ليهم. الناس دول بيبدأوا حياة كاملة جديدة.
أنا عارف إنك بتدفع فلوس مقابل الخدمة ومن حقك تحصل على خدمة سليمة بدون مشاكل. ومن حقك تشتكي العامل للشركة. بس أنا عايزك تتخيل نفسك مكانهم. تخيل نفسك كأنك بتبني بيت جديد من بدايته، والبيت دا بيترنح وممكن يقع، هل هتحب الناس تساعدك وتساندك عشان تقدر تبني البيت دا ولا لأ؟
نفس الشيء بالنسبة للعمال اللي بيشتغلوا في وظائف جديدة، بيكونوا مرتبكين ومهزوزين وممكن شركاتهم ترفدهم بسبب دا، بس الوظيفة دي هتكون مصدر دخل ليهم يعيشوا عليه سنوات طويلة.
مش مطلوب منك تعمل شيء كبير، بل أبسط الأشياء، ساعدهم بكلمة طيبة، ببقشيش، بتشجيعة، بمعلومة مفيدة، الخ
قول لسواق التاكسي: "انت دخلت في شارع غلط وأخرتني، بس أنا مقدر إنك لسه جديد. أنا أنصحك تتعلم استخدام خرائط جوجل على موبايلك هتساعدك كتير في شغلك"
قول لعامل الدليفري اللي أخر طلبك "انت اتأخرت، بس أنا هأدفعلك بردو تيبس، لأني شايفك شاب طموح وهتوصل للي انت عايزه"
قول لعامل المطعم اللي قدملك الأكل بطريقة مش كويسة "كلنا بنكون مرتبكين في بداية شغلنا، بس المرة الجاية عايزك تقدملي المشروب بالطريقة الفلانية"
دا على سبيل المثال، والكلمات الطيبة كتير
أشياء بسيطة جدا بالنسبة لنا، بس بالنسبة كأنها حياة
